أخويا سليم
بعد التحية والسلام والاحترام
احنا فـ زنارة بسلام
و احنا فـ زنارة من بعد ما سافرت وسبتنا
ووحشتنا
نتمني لك كل السعادة والسلام
..............................................
الناس هنا متغيرين ... معرفش ليه متبدلين.....
يمكن مفيش فيهم "سليم" ! وعشان كده متغيرين
وعشان كده متلهفين
متحيرين بين الشوارع فـ البلد
واما تغيب الشمس
و زي عادتهم
تلقي الحريم متلملمين تحت القمر عالمصطبة بالليل
اللي تقزقز لب
والتانية دي بتهب
وحاجات كتير م اللي انت عارفها ....لزوم المصطبة
أما الرجال
بالليل من بعد ما يصلوا العشا..... ييجي العشا
ويطفوا نور البيت ويسلموا الراية...
لست البيت
تحكم علي اخواته ماهم قاعدين
يروحوا الغيط ! .......
ويمزمزوا فـ الشاي
ومش عارفين ؟
قاعدين يعدوا فـ السنين بعد السنين
مستنيين
واوحش ما في الصحبة : آلام الانتظار
واحلي ما فـ الصحبة : الحنين !
.............................................
أما أنا :
من وقت ما تعرف .....
سهران ليالي طوال ويا القمر ....باعزف!
وبأعد حبات النجوم الضهر
زي الرمال الساكنة في أرض الحجاز...... الطهر
ومستنيك .
..............................................................
ليلة ما جاني جواب
عديت حجاز الرمل
ووصلتلك بالقلب
والقلب والع من نيران الشوق ومايملكش غير الانتظار!
من لهفتي ماسك "ألم" قلبي وباكتبلك
قاعد علي الكرسي اللي فاكرلك كلام الليل
وفاكرلك أرق خصام......... ومش ناسي!
عمال يدور زي الزمن
وساعات بيرجع للورا
ولما يرجعني لورا....
بارجع معاه- من غير ما يتلخبط ولا اتلخبط-
واعيد كل اللي فات.........
وساعات يقوللي الواد سليم راح فين !
ينده...... عليك !
وارجع ألف معاه من الأول
وآديني مستني .
......................................
و فـ ليلة: شفت منام
عودين ريحان تحت المطر واقفين
وسحابة بيضا بتعيط
وبتخانق سحابة رعد مسودة !
وعودين ريحان تانيين
متضللين بلحاف وكومة قش ومودة
وصحيت علي صوت الأدان
ورفعت إيدي للسما الصافية
أمسح جبين الليل
وأتوضا بندي قلبين ما يفترقوا
ولا بالموت
...........................................
والليلة دي من بعد ما طالت
خبط علي بابي أدان الفجر فـ معاده
وفتحتله قلبي
ولقيته متحني بلون النيل
القلب شقشق فوق سطوح الغلة يا صحبي
ولأول مرة
شفت السنابل زي ريش النسر بترفرف
شميت عبير الحسن في زهر اللمون
حسيت بنور الشمس فـ عيون الغيطان
مانا قلتلك مرة!
صدقني يا صحبي : لما السما تسود
الليل بيتغرب .....والفجر بيقرب
والدنيا دي اتنين: واحد بيتقرب , والتاني متغرب
.............................................................
أما انت يا صحبي أمرك عجيب والله:
حاسس بغربة ازاي
علي قد ما بيني و ما بينك من المسافات
لكن القلوب شايفاك ....وشايفها
وانا غربتي عارفاني من ملايين
عايش ما بين الأهل و الخلان.....
قلبي ماهوش ملكي
ومتغرب
والغربة دي وحشة !
الله يجيبك لنا ولقلبك التاني : "سالم""سليم "
.....................................
فاكر يا صحبي ليلة ما زعلتك:
كان غصب دا عني , وكان منك !
من بعدها عرفتك
سامحتني , سامحتك
علشان كده لما قريت أول جواب , وباستغرب
خطك ماهوش واضح! ودا عكسك
ولأن انا عارفك
قلبك مابين الكلمة والتانية :
من توب حرير ابيض.......
وخيوطه شابكة.....في حروف ناعمة
وعشان كده كان لازم اقراه مرتين
الأولانية عشانك , و التانية : علشان " سليم ".
...................................
اعذرني يا صحبي
كلامي كتير
الوقت "داء"
والوقت داء الكل
وقبل ما سيبك , مستني منك رد
ولحد ما يجيني: باستودعك رب القلوب
وختام
هناك 5 تعليقات:
ربنا يوفقك ودايما اعرف عنك حاجات جديده كل يوم عدا اللأخطاء الإملاءيه حاجه في منتهى الجمال ياريت تقدر تعملها بالصوت علشان الناس اللي مش حاتقدر تقراها زي ما انت عاوز
كان نفسى يا صاحبى اكون الاول .. كان نفسى يا صاحبى أكون " سليم " .. لكن عزائى أنه يستاهل .. دبحتنى يا صاحبى بموالك لكن عزائى إنك طبيب وحتداوى جراحى كالعادة ..رجعتنى لإصحابى و اصحابك و سهر ليلنا الطوييييييييييييل وريحة ريحان بيتكم وحبات الندى والطين .. ربنا يسامحكيا صاحبى لو كنت عارف كده لكنت يوم قلتلك و لا عرفتك سكة التدوين .. وعجبى
مبروك يا ريس ولو كان ده اول الغيث يبقى لازم انبه الزملاء ان الكبير وصل .. تحياتى يا صديقى العزيز
صور جميله جدا
للصداقه والحياه الجميله اللتي لم تلوثها المدنيه
تحياتي لك
جميله جدا جدا جدا
فكرتنى بالابنودى
حلوه الروح اللى انت رسمتها
مبروك على المدونه انا عرفتها من عند استاذ حازم صديقك واضح ا نه بيعزك قوى ربنا يديم المعروف
فى انتظار الغيث
:)
bassboss:
فكرتك جميلة بس الحق يقال أنا لسه مش عارف أعملها إزاي . أشكرك
حازم:
استطعت أن تغلبني هذه المرة أيضا
أشكرك علي مبالغاتك عني وأرجو ألا تعلق علي تعليقي هذا لأنك برضه هتغلبني
اسكندراني أوي :
ولك مني خالص التحيات علي ذكاءك النابض من تركيزك وعلي تحياتك
لماضة :
عاوز أقوللك حاجة بس مش عارف أقولها ازاي. يعني زنقتيني
أشكرك علي زيارتك و ماتسمعيش كل الكلام اللي بيتقال
إرسال تعليق